తెలుగుదనం.కో.ఇన్ [telugudanam.co.in]

www.telugudanam.co.in చీరాల

పత్రికలలో తెలుగుదనం

మా అనుబంధ వెబ్‌సైట్..

సంస్కృతి, సంప్రదాయాలు

తెలుగుదనం బ్లాగు

అలంకరణ

ఆకర్షించే గలగల గాజులు

చేతులకు ధగధగమని మెరిసే బంగారు గాజులు ఎన్ని వున్నా వాటి మధ్యలో మట్టిగాజులు వేసుకుంటేనే వాటికి మరింత నిగారింపు వస్తుంది.
పెళ్ళిళ్ళు, శుభకార్యాలకు రెండు చేతులకూ రంగురంగుల మట్టిగాజులు వేసుకుంటే మహిళల చేతులు కళకళలాడుతూ ఆకర్షణీయంగా వుంటాయి.
చిన్నపిల్లలకైతే మట్టి, పింగాణీతో చేసిన గాజులు వేయడం కన్నా ప్లాస్టిక్, రబ్బరు, మెటల్, బంగారంతో చేసిన గాజులే భద్రంగానూ, చూడముచ్చటగానూ వుంటాయి.
చిన్నపిల్లలకు సన్నటి గాజులు నాలుగైదు వేయడంకన్నా వెడల్పుగా వుండే సింగిల్ గాజు వేస్తేనే అందంగా వుంటుంది.
రోజూ వేసుకునే కటింగ్స్ గాజు, గాజులకు వుండే మెరుపు కొన్ని రోజులకు పోతుంది. వాటిని వెంటనే మార్చేయాలి. లేకుంటే అందవికారంగా వుంటుంది.
పెద్దవాళ్ళకు కాఫీ, నీలం, వైలెట్, ఎరుపు, ఆకుపచ్చ మొదలైన ముదురు రంగు గాజులపై డిజైన్స్ వున్న గాజులు బావుంటాయి.
బంగారం గాజుల మధ్యలో మెరుపు గాజులు వేసుకోవడం కన్నా ప్లెయిన్ కలర్ ముదురు రంగు గాజులు వేసుకొంటే అందంగా వుంటుంది. కొంతమంది చేతికి అడ్డశిల వుండటంతో మట్టిగాజులను ఎక్కించడం కొంచెం కష్టమవుతుంది. అటువంటివారు చేతికి క్రీం రాసుకొని గాజులు వేసుకుంటారు. అలా కాకుండా బాత్‌సోప్‌ను చేతికి పట్టించి గాజులు వేసుకుంటే త్వరగా వేసుకోవచ్చు. చిట్లకుండానూ వుంటాయి.
పండగ సందర్భాల్లో కొత్త డ్రస్‌కు కప్పే రంగు గాజు, గాజులు రెండు చేతులకు వేసుకుంటే పండగ సందడి అంతా గాజుల గలగలలోనే వుంటుంది.

అందాన్ని పెంచే సిందూరం

సాధారణంగా మహిళలను చూసిన వెంటనే అందరి దృష్టినీ ఆకర్షించేది నుదుటి మీద వుండే సిందూరమే. ఆడవారి ముఖం అందంగా ఆకర్షణగా కనిపించడానికి ప్రధాన కారణం కళ్ళకు పెట్టుకునే కాటుక, నుదుటి మీద వుండే తిలకం బొట్టు. ముఖం ఆకృతిని బట్టి ఎవరు ఏవిధమైన బొట్టు పెట్టుకుంటే అందంగా వుంటుందో తెలుసుకొని ఆవిధంగా పెట్టుకుంటే ముఖ సౌందర్యం రెట్టింపు అవుతుంది.

శరీరం రంగు, ధరించే దుస్తులను బట్టి ఎలాంటి బొట్టు పెట్టుకోవాలో నిర్ణయించుకోవాలి. అలాగే నుదురు ఆకృతిని బట్టి కూడా ఏ బొట్టు నప్పుతుందో చూసుకోవాలి.
నుదురు చిన్నగా వుంటే కొంచెం పొడవుగా వుండే బొట్టు, ఆటీన్ ఆకారంలో వుంటే బొట్టు పెట్టుకోవాలి.
నుదురు వెడల్పుగా వుంటే గుండ్రని బొట్టు మరింత అందాన్నిస్తుంది.
నుదురు పెద్దగా వుండేవారు బొట్టును కనుబొమల మధ్య కాకుండా కొంచెం పైకి పెట్టుకుంటే అందంగా వుంటుంది.
తెల్లని శరీరఛాయ గలిగిన వారికి ముదురురంగు బొట్టు ఆకర్షణీయంగా వుంటుంది. చామనఛాయ లేదా అంతకన్న కాస్త రంగు తక్కువగా వున్నవారైతే పింక్, ఆరంజ్, గంధపురంగు, లేత గులాబి రంగు, ఎరుపు రంగు బొట్టు కళగా వుంటాయి.
కళ్ళు పెద్దవిగా వుంటే పెద్ద బొట్టు, చిన్నగా వుంటే కొంచెం చిన్నసైజు బొట్టు శోభాయమానంగా వుంటుంది.
నుదురు పెద్దగా వున్నవారు పెద్ద బొట్టు పెట్టుకుంటే నుదురు పెద్దగా వున్న విషయం అంతగా తెలీదు.
చిన్నవాళ్ళకి రకరకాల ఆకృతులు, మ్యాచింగ్ రంగుల బొట్టు పెట్టుకున్నా బావుంటుంది. కానీ మధ్యవయసు వారికి ఎరుపు, పింక్ వంటి రంగులు, గుండ్రటి బొట్టు నిండుదనాన్నిస్తుంది.
పొట్టిగా వున్నవాళ్ళు పొడుగు బొట్టు పెట్టుకొంటే అందంగా, హుందాగా కనిపిస్తారు.

మూలం : ఆదివారం, మార్చి 6, 2006 వార్త